نشر الإعلامي إبراهيم فايق ، منشور له احتفالا بعيد ميلاده الـ 40، مضيفا أنه يرى أن سن الأربعين رقم كبير من الصعب الوصول له.
وتابع إبراهيم فايق : “40 سنة مش هنكر خضتي من الرقم، أنا كنت بشوفهم زمان ناس كبيرة بس الدور جه عليا فجأة وأنا لسة ماسك في إيدي دراع الأتاري، جايز اللي فات مش قد اللي جاي بس السيرة أطول من اللي فات واللي جاي بإذن الله
وقال” اللهم لك الحمد والشكر 40 سنة مرحلة جديدة في عمري، عداد جديد بيشوف أرقام ناحية الشمال كلها 4، أرقام بتطالبني إني أحاسب نفسي وأراقبها علشان أبقى أفضل نسخة من نفسي، وعلشان مفيش أعذار، ده سن النضج والهدوء واكتمال الشخصية”.
أوضح: “فضل ربنا عليا عظيم كرمني بعطفه وشملني برحمته لمست السما بإيدي في لحظات من الفرحة واتهبدت على الأرض واتكسر خاطري في لحظات من الحزن، رضيت بكل مراحل حياتي وسلمت أمري لله وتركت له التدبير وشغلت نفسي بمهمة السعي فقط فكانت النتائج أعظم بكتير من أحلامي”.
وأشار إلى أنه : “40 سنة ولسة الشغف جوايا للنجاح بنفس طاقة العيل اللي لسه بيحلم يحقق ذاته، 40 سنة ولسة بعافر وهعافر علشان أتعلم أكتر وأفهم أكتر، 40 سنة ولسة عايز أشتغل زيادة على عيوبي وأشتغل أكتر على نفسي”.
