حلت الكاتبة الصحفية والبرلمانية فريدة الشوباشي ضيفة في برنامج كلم ربنا على الراديو 90.90 مع الكاتب الصحفي أحمد الخطيب.
وقالت فريدة الشوباشي: فجأة والدي فقد كل ما نملك بسبب مشكلة وأزمة ملناش يد فيها، وتبدل حال الأسرة للأسوأ لدرجة أن أثاث بيتنا اتباع
والدتي لما شافت عفش البيت بيتباع قدام عينيها بكت بحرقة علشان العفش ده من أبوها كان من أعيان حلوان .. وقتها نمنا لأًول مرة فوق المراتب على الأرض.
وأضافت: لما شفت أمي بتبكي و الحال بيتبدل في لحظة بكيت وكلمت ربنا بدموعي، اللحظة دي كانت صعبة جدا عليا ولقيت نفسي بقول لربنا أرجوك استرني وساعدني علشان أسرتي تقف علي رجليها من الأزمة دي.
وتابعت: بدأت أشتغل وأدي دروس خصوصية بسبب تفوقى في الدراسة بالفرنسية ربنا فتح لي باب رزق علشان اعوض اسرتي عن اللى فقدته.
وواصلت: بدأت رحلة الستر معايا وعايشة لحد دلوقتي مستورة جدا وراضيه ومبسوطة لأني مؤمنة أن التدين بالجوهر مش بالمظهر،
بعد تجربة إصابتي بكورونا شعرت بعجز بسيط لأني مكنتش قادرة امشي، فكلمت ربنا ورجوته أنه لحد آخر يوم في عمرى اقدر اعمل كل حاجتي الشخصية بنفسي ومبقاش محتاجة لحد.. وأنا احتياجاتي بسيطة جدا.. يعني أجمل وألذ اكلة عندي هي الجبنة البيضا كان بيعشقها الزعيم جمال عبد الناصر.
واختتمت: طول عمري بشعر أن فيه بيني وبين ربنا طريق مفتوح للكلام، لأن عمري ما طلبت منه حاجة بعشم وخذلني أبدا بيني وبين ربنا سلام كبير يسمح لى أناجيه وأطلب منه أي شيئ ومبحبش يبقى بيني وبين ربنا واسطة.. انا اللى بكلمه لنفسي وبنفسي بدون حواجز.
