شنت الإعلامية رشا الخطيب، هجوماً لاذعاً على القائمين على المهرجانات، وتصدر بعض الشخصيات دون المستوى على قائمة الاحتفالات .
ونشرت رشا الخطيب منشورا على صفحتها الشخصية على موقع التواصل الاجتماعي فيس بوك: “مساء الفل والفخر لكل مصري ومصرية، مساء الياسمين على كل اخواتي وأصدقائي بكل مكان، اسمحولي بس آخد من وقتكم شوية عاوزة أتكلم معاكم عن شخصية مصرية معرفش إزاي بكل أسف الإعلام المصري مش بيتكلم عنه”
وتابعت: “الأفاضل أصحاب المهرجانات والتكريمات بكل أسف إحنا بنتكلم بس بالحاجات الهايفة والفضايح، وبنموت ونعشق ظهور الفضايح والجوانب السيئة.. دي اتجوزت ودي انتحرت والأغاني الهابطة وتكريمات أشخاص لا حول ولا قوة إلا بالله”
وأضافت: “معرفش عملوا إيه لمصر أساسا وطبعا أنا بتكلم هنا عن المهرجانات اللي تحت السلم، مش بقصد فيها المهرجانات الكبيرة”
واستكملت: “المهم نرجع لموضوعنا عشان منخرجش عن الموضوع الأساسي أنا عاوزة بس أتكلم معاكم عن شخصية عظيمة جدا وهو الدكتور المصري (هاني عبد الجواد) دكتور هاني استشاري جراحة العمود الفقري للأطفال”
وأردفت: “دكتور هاني أنا بعتبره علم من علماء الطب في جراحة العمود الفقري ولكن بكل أسف وخجل محدش بيتكلم عنه وعن نجاحه، مفيش حد كتب بوست وشكر الدكتور إنه سبب في رفع رأس كل مصري ومصرية خارج مصر”
ووجهت رشا الخطيب الشكر للطبيب العالمي قائلة: “أنا بشكرك جدا لأن حضرتك فخر لكل المصريين وأثبت للعالم كله أد إيه مصر عظيمة وشعبها عظيم، شكرا وتحياتي لحضرتك ومن نجاح لنجاح وعاوزة أقول إن مصر فيها شخصيات كتير مشرفة وناجحة وعلماء بس إحنا للأسف مغيبين عنهم”
واختتمت حديثها قائلة: “إحنا كفاية علينا نتكلم بالجوانب السيئة والهابطة فياريت نغير الصورة ونظهر الجوانب الإيجابية الناجحة نتكلم عنهم ونشكرهم، ده واجب علينا وبكل المجالات هنشوف شخص ناجح ده اللي لازم نشجعه ونكرمه ونتكلم عنه عشان هو الدافع القوي للأجيال القادمة، وشكرا لكل مصري ساهم برفع رأس المصريين وإظهار قيمه مصر أمام العالم كله”
