استضاف الكاتب الصحفي أحمد الخطيب مقدم برنامج كلم ربنا على الراديو 90.90 الفنان عصام السقا الذي لعب شخصية نعيم في مسلسل جعفر العمدة.
قال الفنان عصام السقا،: أنا هحكى موقف هقوله لأول مرة في حياتي لأنه صعب عليا نفسيا، أنا من أسرة علي اد حالها ومن قرية بسيطة من مركز ملوي في المنيا .. تنسيق الثانوية العامة وداني كلية الخدمة الاجتماعية في البحيرة.
وتابع: اضطرني أخرج من القرية وأفارق أمي وأخواتي أبويا جه معايا يوصلني محطة القطر من المنيا علشان أروح البحيرة،كان شايل معاه زوادة ليا فيها أكل ومعونة، وقبل ما القطر يدخل المحطة شفت دموع مكتومة في عيون أبويا.
وأضاف: أبويا كان عارف إني لازم وأنا بدرس اشتغل علشان أصرف علي نفسي، يعني أنا مسافر ادرس واشتغل كنت صعبان عليه لأنه كان خايف عليا وأنا لسه صغير طالع للدنيا، كان بيخبي دموعه مني .. ركبت القطر وودعني من غير كلام .. السكوت والدموع كانوا أبطال الموقف.
وواصل في اللحظة دي بصيت للسماء وكلمت ربنا من جوايا وخدت أهم قرار في حياتي وهو إنى مش راجع البلد الا وأنا ناجح فى الدراسة .. وفى حياتى كلها.
وأردف:من شباك القطر وطول السكة بقيت أبص في السما وأكلم ربنا.. بقيت أقوله وأنا ببكي يجبر خاطري بحق دموع أبويا اللى كانت في عينيه!
الموقف ده ميعرفوش أبويا حتي الآن وهيكتشف دلوقتي بعد ما يسمعني وبعد ٢٠ سنة إني شفت دموعه اللي كان بيخبيها مني، حياتي بدأت بعد الموقف ده .. وابتديت الرحلة الصعبة .. قاسيت كتير وتعبت .. لكن دايما كنت سايبها على ربنا علشان يحقق طموحي وينجحني.
وواصل: اشتغلت وأنا بدرس علشان أصرف على نفسي.. واشتغلت في سوبر ماركت وعامل في مكتبة.. وعامل في مصنع زيت، واشتغلت في انترنت كافيه في شارع الهرم.. ولما عشت في القاهرة عشت مع خالتي في حلوان، وبعدها اشتغلت بياع جرايد أمام مسرح الزعيم فى الهرم، في كل الرحلة دى كنت بكلم ربنا وألح عليه إنه ميكسرنيش.
واختتم: أكتر اسم بحبه من أسماء ربنا هو الجبار.. لأن معناه مرتبط بجبر الخاطر وجبر المكسور وجبر الضعيف .. ودايما جبر ربنا لخاطري كان موجود لأنه طبطب عليا في مواقف كتير صعبة، دلوقتي أقدر أقول لأبويا بعد النجاح اللي أنا فيه دموعك كانت أغلي دموع في حياتي.
