كشف الإعلامي أحمد سالم خلال حواره مع برنامج كلم ربنا على الراديو 90.90 تقديم الكاتب الصحفي أحمد الخطيب تفاصيل عن حياته لأول مرة.
وقال الإعلامي أحمد سالم: هحكي سر مفيش مخلوق يعرفه عني غير أهلي وبقوله لأول مرة في الإعلام.. كنت أب لأطفال صغيرين ومهتم بصحتي جدا وفوجئت من كام سنة بكحة غريبة ومعاها نقطتين دم.
وتابع : الطبيب أمرني أعمل أشعة فورا وكانت المفاجأة إن عندي نزيف رئوي حاد ، وطلع عندي سرطان ورم خبيث في الرئة، والأطباء قالولي يومها “كويس إنك عايش”!.
وواصل : انهرت أنا وأسرتي وأولادي ودخلت في أزمة نفسية رهيبة.. وملقتش قدامي غير إني أكلم ربنا، وبقيت أهتف من جوايا لربنا بكلمة واحدة “عايز أعيش”!.
وأكمل :دخلت في نوبة بكاء وأنا بقول لربنا آسف حقك عليا أنا مشبعتش من الدنيا وعاوز أربي أطفالي وآخد بالي من أمي وإخواتي..كنت ببكي بحرقة، رغم إني من عادتي مبكيش كتير في حياتي ورحت لأكبر دكتور في مجال الأورام واتحجز لى عملية.
وأوضح أنه قبل : العملية كلمت ربنا مرة تانية وقولتله محدش في إيده ينقذني غيرك وطلبت منه مهلة أعيش شهر..دخلت العملية مكنتش شايف حد حواليا، كله خيالات، لكن من رحمة ربنا بيا أنزل عليا السكينة فطبطبت على إيد أمي وقلت لها متخافيش انا راجع تاني.
وكشف عن أن العملية استغرقت ساعات كنت فرحان زي الطفل واتكتب لى عمر جديد ومكنتش مصدق إني عشت.
واختتم :بعد نجاح العملية وشفائي من السرطان عقدت اتفاق مع ربنا، عملت “ديل” فيه تفاصيل مش هينفع احكيها ولا حد يعرفها .. وأنا دلوقتي ماشي بموجب الاتفاق دا لحد النهاردة،
بشكر ربنا مرة واتنين وألف، لأني سبق وطلبت منه أعيش شهر.. وأديني عايش سنين.
