استضاف الكاتب الصحفي أحمد الخطيب، الكاتبة الصحفية أماني ضرغام حرم الكاتب الصحفي الكبير والراحل ياسر رزق في برنامج كلم ربنا على الراديو 90.90.
وقالت الكاتبة الصحفية أماني ضرغام، أنا عشت حياة صعبة جدا، الوالدين انفصلوا، الوالد سافر خارج البلاد وأمي تزوجت وابتعدت فجأة لقيت نفسي أم اخواتي ومسئولة عن تربيتهم، وأنا عندي 13 سنة.
وأضافت أثناء حوارها مع برنامج كلم ربنا:عشت أنا واخواتي عيشه قاسية في بيت عمي كل دا عمل ليا أزمة نفسية كبيرة ولولا علاقتي بربنا ما كنت أقدر أتحمل كل ده!
وتابعت: جدتي الله يرحمها علمتني أكلم ربنا.. وإزاي أقوله كلام يبعث السكينة في نفسي وروحي ويعين على ما مريت بيه في حياتي.
وواصلت: تزوجت ياسر رزق بعد أزمة وانفصال من زوجي الأول، ياسر كان شديد التعلق بربنا وعلي يدي اتشاهد مرتين لحظة وفاته، ومات علي كتف عمر ابنه وصعدت روحه في سلام.
وأردفت: ياسر رزق مات زعلان ولما شفته زعلان كلمت ربنا في ساعة فجرية، وقلت له : يارب ياسر جايلك وهو زعلان انصره وراضيه.
واختتمت : قلت لربنا بدموعي ياسر من عبادك الصالحين وحسيت إني بيني وبين السما براح ومفيش حواجز وإن دعوتي وصلت لملكوت الله تاني يوم شفت نصرة ربنا لياسر رزق بعيني لما رئيس الدولة بجلالة قدره كرمه تكريما غير مسبوق للصحفيين بإطلاق اسمه وتخليده على محور مروري هام في القاهرة.. ودي كانت طبطبه واستجابة دعواتي لربنا بإنه ينصره، دلوقتي أقدر أقول ان ياسر رزق خد حقه لأن ربنا مع المنكسرين جابر.
وفي السابق حل الدكتور أحمد زايد، رئيس مكتبة الإسكندرية ضيفا في برنامج كلم ربنا على الراديو 90.90
مع الكاتب الصحفي أحمد الخطيب.
وروى الدكتور أحمد زايد، رئيس مكتبة الإسكندرية، تفاصيل أصعب موقف مر به في حياته وهو مرض زوجته.
وقال :مرض زوجتي كان أثقل شيئ مر عليا في حياتي، لأنها ظلت سنين طويله مريضة مرض
قاسي وصعب.
وتابع: خلال هذه الفترة كنت بجوارها وواقف جمبها، ورفضت أجيب حد يكون في خدمتها..وقلت لنفسي لازم أكون أنا خادمها وتحت قدميها ، تقديرا واكراما لها زي ما أكرمتني.
وذكر :طول فترة مرضها كنت بكلم ربنا إنه يشفبها ويعينني على خدمتها .. لكن فجأة ماتت مني وكسرت قلبي.. ابني أيضا تعرض لأزمة صعبة وذهبت بسببه العمرة وكلمت ربنا يتدخل ..وفي قلب الحرم ومن أمام الكعبة تلقيت اتصال بحل مشكلة ابني.
وواصل : الموقفين دول كانوا أصعب موقفين في حياتي .. لكن ربنا ساعدني اني اتحمل و بعد وفاة زوجتي حبيبتي، تملكني شعور رهيب بالفقد.. وخرجت من هذه الحالة الحزينة للدخول في حالات حزن أخرى بسبب الفقد ووفاة 3 أصدقاء آخرين حزنت عليهم حزن شديد.
