استضاف الكاتب الصحفي أحمد الخطيب مقدم برنامج كلم ربنا على الراديو 90.90
الكاتب الصحفي، الكبير أكرم القصاص رئيس تحرير اليوم السابع.
وقال الكاتب الصحفي، أكرم القصاص: أنا فقدت أمي وأبويا واخواتي الثلاثة، موتهم هو أصعب وأقسي احساس في الدنيا.
وأضاف: بعاني من مرارة الفقد التي جعلت من الحياة مجرد محطة للإنتظار علشان نفسي أقابلهم وأشوفهم لأنهم وحشوني جدا.
وواصل: مات والدي كان حنين جدا، وماتت بعده أمي ربتني وتولت رعايتي و كانت سيدة ذكية وشديدة الدأب في الحياة، وفي اللحظة ماتت فيها أمي تحديدا حسيت باليتم وفقدان جناحي الحياة.
وتابع : في وفاة أمي لجأت لربنا وكلمته وقلت له أنا مبقدرش اتحمل الفراق خصوصا لأقرب الناس ليا لكن فهمت بعد الكلام مع ربنا إن دا ابتلاء ولازم أصبر وسألته يهون الأمر عليا، ساعتها وصلت لصيغة بيني وبين نفسي إن اللى مات دا راح مشوار وراجع، لذلك من رحمة ربنا بيا اني دائم رؤيتهم في منامي ودايما استدعيهم من الذاكرة.
وأردف: رغم شكوتي لربنا من مرارة فقد أبويا وأمي إلا أنه بعدها مرض أخويا أيمن ومات في عز شبابه وبعده مات حسين أخويا وكان انسان طيب جدا، وبعدهم توفي أخي الدكتور أشرف، ماتوا التلاته، وبعد الرحيل القاسي ده كلمت ربنا وقلتله مش قادر علي مرارة الفراق والفقد واستجاب ليا بإنهم بقوا دايما معايا في احلامي وخيالي وبشوفهم علطول.
واختتم: أنا بطلب من ربنا يمد في عمر باقي اسرتي وإنه يرزقني بإني أكون قادر على إني أسيب ذكرى طيبة في الحياة تنفع الناس وتمكث في الأرض، ربنا صديقي رحيم وعظيم وكبير وودود وكتير لجأت له أطلب منه راحة البال وسكينة وأمان ولم يخذلني في أى مرة من المرات.
